აღმაშენებლის გამზირზე საინჟინრო - კომუნიკაციების რეაბილიტაციის სამუშაოები მიმდინარეობს, რომელიც მოიცავს ახალი სადრენაჟე და სანიაღვრე ქსელის მოწყობას, ძველი საკანალიზაციო ქსელის დემონტაჟს და ახლით შეცვლას, ასევე ახალი მაგისტრალური წყალსადენის მილის მოწყობას.

   დავით აღმაშენებლის გამზირ N26 - ში მდებარე ისტორიული შენობის სარეაბილიტაციო სამუშაოები პროექტ „ახალი ტფილისის“ ფარგლებში მიმდინარეობს. სულ ახლახანს, აღმაშენებლის N26 - ის სადარბაზოს კედლებზე XX საუკუნის მხატვრობა აღმოჩნდა, რომლის სრულ წარმოჩენაზე რესტავრატორები მუშაობენ.

   პროექტ „ახალი ტფილისის“რეაბილიტაციის პროცესში, დავით აღმაშენებლის გამზირ N36 - ში  სადარბაზოს მხატვრობის რესტავრაციისას, მე- 2 სართულის კედელზე შოთა რუსთაველის „ვეფხისტყაოსნიდან“ კიდევ ერთი სცენა გამოიკვეთა. დავით აღმაშენებლის გამზირ N36 - ის სადარბაზოს კედლებზე გამოსახული „ვეფხისტყაოსნის“ სცენები მიხეილ ზიჩის ილუსტრაციის მიხედვითაა შესრულებული.

   თბილისის განვითარების ფონდი პროექტ „ახალი ტფილისის“ ფარგლებში ახორციელებს ლადო გუდიაშვილის სახელობის მოედანსა და მისი მიმდებარე არეალის  აღდგენა-განახლებას. მოსამზადებელი ეტაპით გათვალისწინებული, საინჟინრო ქსელების რეაბილიტაციის  სამუშაოები დაიწყო, რომელიც გათვალისწინებულია შემდეგ მისამართებზე: გუდიაშვილის მოედანი, ჯიბლაძიდან - ბეთლემის ქუჩამდე,  ახოსპირელის ქუჩის გასასვლელიდან - გუდიაშვილის მოედნამდე მონაკვეთი, ლადო ასათიანის ქუჩიდან - ბეთლემის მოედნამდე,  ახოსპრელის ქუჩიდან ლერმონტოვის მიმართულებით და გუდიაშვილის  მოედნიდან ლერმონტოვის ქუჩისკენ.

   დავით აღმაშენებლის გამზირ N22 - ში მდებარე შენობის რეაბილიტაცია პროექტ "ახალი ტფილისის"I ეტაპის ფარგლებში ხორციელდება. რომის ქუჩისა და აღმაშენებლის გამზირის კვეთაზე მდგარი შენობა 2007 წელს ჩამოინგრა და საცხოვრებლად უვარგისი გახდა. მძიმე კონსტრუქციული მდგომარეობიდან გამომდინარე, სახლი დაიშალა და იმავე პროექტის მიხედვით ახლის მშენებლობა მიმდინარეობს. დავით აღმაშენებლის გამზირ N22 - ში ამჟამად რკინა-ბეტონის კარკასი იგება. შენობა გამზირის მხრიდან ორსართულიანი იქნება, რომლის თავზე ხის მანსარდა მოეწყობა.

   პროექტ "ახალი ტფილისის" ფარგლებში თბილისის განვითარების ფონდის მიერ  ისტორიული სადარბაზოების აღდგენა მიმდინარეობს. სარეაბილიტაციო სამუშაოების დროს დავით აღმაშენებლის გამზირ N26 - ში, დავით აღმაშენებლის გამზირ N72- სა და ღვინის აღმართ N1- ში მხატვრულად გაფორმებული ისტორიული სადარბაზოები აღმოჩნდა, რომელიც საღებავის სქელი ფენით იყო დაფარული და მათი არსებობა სპეციალისტების კვლევებშიც არ იყო ცნობილი. აღნიშნულ  მისამართებზე  თბილისის განვითარების ფონდის დავალებით, სადარბაზოების  დაფარული მხატვრობის შენარჩუნების და აღდგენისთვის რესტავრატორები მუშაობენ.

   პროექტ "ახალი ტფილისის" სარეაბილტაციო სამუშაოები დავით აღმაშენებლის გამზირზე 4 თვის მანძილზე მიმდინარეობს. გამზირზე არსებულ 47 ისტორიულ შენობას რესტავრაცია და რეაბილიტაცია უტარდება. სახლების ძირითად ნაწილზე უკვე აღდგა ძველი ხის და რკინის ჭვირული აივნები, ნაწილზე სამუშაოები  ჯერ კიდევ მიმდინარეობს.  დეკორატიულ აივნებს, რომლებმაც საუკუნეებს გაუძლო და დღემდე დაზიანებული, მაგრამ მაინც პირვანდელი სახით შემორჩა, სპეციალურ სარესტავრაციო საამქროებსა და სამჭედლოებში ისტორიულ ძეგლებზე მომუშავე სპეციალისტები აღადგენენ.

   პროექტ "ახალი ტფილისის" ფარგლებში, აღმაშენებლის გამზირის სარეაბილიტაციო არეალში 47 შენობის რესტავრაცია და რეაბილიტაცია მიმდინარეობს, მათ შორის შენობების გადახურვის სამუშაოები ხორციელდება.
ამ ეტაპზე, აღმაშენებლის გამზირზე მდებარე შენობებზე შეიცვალა საწვიმარი ძაბრები და ღარები,  ეგრეთწოდებული "ჟოლოპები".