გალაკტიონ ტაბიძის ქუჩა N18-ში მდებარე შენობა, XIX – XX საუკუნის დასაწყისის თბილისური არქიტექტურის ერთ-ერთი გამორჩეული ნაგებობაა, რომელიც 1911 წელს ძმები სეილანოვების მიერ არის აგებული. სადარბაზო კი იმ პერიოდისთვის დამახასიათებლი ტექნიკური ხერხებით ბენო ტელინგატერის მიერ არის მოხატული. ბენო ტელინგატერი თბილისური სახლებისა და ბაქოს თეატრების დეკორატორად მუშაობდა.
სადარბაზოს ინტერიერის კედლებზე ალეგორიული და ორნამენტული კომპოზიციებია წარმოდგენილი. პირველი სართულის მხატვრობა ზეთის საღებავით არის შესრულებული, დანარჩენ სივრცეში კი დეკორატიული მხატვრობით დაფარულ ისტორიულ შპალიერს ვხვდებით.
სარესტავრაციო სამუშაოების შემდეგ ისტორიულმა სადარბაზომ დაიბრუნა იერსახე და ღირებულება და კიდევ მრავალი წლის განმავლობაში იქნება ძველი თბილისის უმნიშვნელოვანესი მიზიდულობის კერა დამთვალიერებლებისთვის.
თბილისის განვითარების ფონდმა პროექტ “ახალი ტფილისის” ისტორიული სადარბაზოების აღდგენის პროგრამის ფარგლებში, გ. ტაბიძის N18 –ში მდებარე ისტორიული სადარბაზოს სარესტავრაციო სამუშაოები განახორციელა.
სამუშაოების ფარგლებში გაიწმინდა გადაღებილი კედლის ზედაპირები, აღდგა დაზიანებული დეკორატიული და მხატვრული ელემენტები, შესაბამისი წესების დაცვით აღდგა და დაკონსერვდა მხატვრობა და სხვადასხვა დეტალები, დარესტავრირდა სადარბაზოში არსებული ხის და რკინის ნაკეთობები, მოწესრიგდა შესასვლელი კარი და სხვა ინფრასტრუქტურა.
#ახალიტფილისი2018
